Segun Atilay Uslu: Corendon lo kumpli ku tur kompromiso di Mundial 2026 pero despues ta stòp

Willemstad –  Ya no ta un sekreto mas ku gerente di Corendon, Atilay Uslu a keda desepshoná pa ku e desishon di direktiva di FFK pa no trese Dick Advocaat bek komo tékniko di nos selekshon nashonal di futbòl. Manera EXTRA a skibi ampliamente awe mainta tabatin e posibilidat pa trese Advocaat bek na lugá di Fred Rutten pa bai Mundial 2026. Den un deklarashon na EXTRA, Uslu a indiká ku e lo kumpli ku tur palabrashon finansiero ku e tin ku FFK pa ku Mundial 2026 paso e ta hòmber di palabra. Lamentablemente si despues ku Mundial pasa Corendon lo no ta e motor finansiero mas tras di e selekshon nashonal. Manera ta konosí for di prinsipio asta promé ku weganan di klasifikashon pa Mundial 2026, Atilay Uslu a hinka su skouder bou di proyekto aki i a kere den esaki. Mas importante Uslu tabata esun ku finansieramente a sostené e soño di nos tur. E ta kere firmemente ku huntu ku Advocaat e selekshon di futbòl lo por hasi un muchu mas mihó papel.