WILLEMSTAD.- E konosido i popular dj Boogieman (Willy ‘Juni’ Harms) tin un petishon serio na AMAK pa loke ta trata grabashon profeshonal di e tumbanan ganadó di aña 2000 bai ariba.
Kuminsando su komentario riba facebook ku e frase: ‘Awe ma disidí di trapa tenchi numa’, dj Boogieman ta proponé pa traha un orkesta profeshonal, buska tur ganadó i laga areglistanan manera Axel Pikero, Gregory Colina, Dwight Leoneta, Ravello Antoin, Randal Corsen, Angelo Dopwell, Ike Jesurun, Gedeon Chandler i Hershel Rosario areglá i ‘re graba’ e ganadónan di nobo pa yega na un kalidat aseptabel, esaki si di bèrdat ta keda ‘zeur’ ku tin ku respetá nos patrimonio nashonal.
Esaki sigur si ke pa djnan toka nan mas tantu. ‘Ami ku ta purba toka tumba na fiesta mei mei di aña ta sinti bèrgwensa pa toka produkto di kalidat inferior ala Radio Caracas AM low-fi. Asta Sonora Matancera ku Compay Segundo ta zona mihó. Asina AMAK ke promové patrimonio nashonal?’.
Mas aleu dj Boogieman a indiká ku nos tin téknikonan di zonido kapas pa buta bon zonido pa públiko i stage, pero esei ta totalmente otro kos ku grabashon i mastering. ‘Bo mester ta un tékniko apart sinta pafó di Festival Center pa graba i pa despues riba un rùst e bai mix i master’.
Dj Boogieman ta hasi un supliká pa ‘Please hasi bosnan hùiswèrk i kuminsá invertí den un produkto ku ta bale la pensa pa konserva. Por fabor tuma un ehèmpel riba grabashonnan di Serenata (Harry Moen), Issocco i algun mas’.
Boogieman a indiká ku resientemente un turista a puntr’e si ela graba e tumba ‘live’ ku su telefòn, paso asina di bèrdat nan ta zona ora bo kompará nan ku disko normal graba.
Finalmente Boogieman ta bolbe enfatisá ku nos tin téknikonan kapas, nos tin ekipo sufisiente, nos tin tres dia pa drecha promé ku graba i nos tin mesun lokalidat tur aña.
‘E ta un petishon na AMAK i ta nan miembronan tin ku disidí ku nan ke pa nan komposishon keda trata ku rèspèt’, asina dj Boogieman a terminá bisando ‘DEN E BEMBE’ ayera nochi.