WILLEMSTAD.- ‘Mi ta pro ‘royalties’ pa merkado grandi, asina Gilbert ‘Gibi’ Doran, kompositor di mas ku 600 komposishon a kuminsá deklará. ‘Mi ta inskribí na BUMA/ STEMRA i mi ta di akuerdo ku ta kobra ‘royalties’ na paisnan grandi kaminda miónes di hende ta habitá, kaminda tin un ekonomia mas floresiente. Aki na Kòrsou komo artista e situashon di radio emisora versus artista ta un di ‘duna i tuma’. Na Kòrsou nos ta graba un produkshon ku no ta generá plaka, nos ta duna e radio pa e toke i for di esaki nos por haña mas toka, asina nos ta drai den e merkado chikí aki. E montante di 3 mil florin ta muchu haltu. Aki na Kòrsou kaminda tin 29 emisora mester drai for di dje, mester paga empleado i tur sobrá gastu, e 3 mil heldu ta un montante eksageradamente haltu. Pa ami nos merkado ta demasiado chikí pa apliká e sistema aki. Aki ta e sistema di ‘duna i tuma’ ta esun pa apliká. Si radionan tin ku paga ‘royalties’ bo ta bin haña bu ku e situashon kaminda niun hende no por bin promové su produkto, e artista tin ku paga pa promové su produkshon musikal. Niun hende no ta kontra di ‘royalties’, úniko kos e montante mester ta muchu mas abou pa aña. Kòrsou tin un lei ku ta data di 1913 ku ta regla e derechi di outor, no por kita for di dje. Ami lo no kobra ‘royalties’ na niun merkado chikí, na niun radio na Kòrsou, esaki pa ami por sigui drai komo artista’, asina Gibi Doran a terminá bisando.