Rondó di Schottegat ainda e área mas interesante

WILLEMSTAD.- Si kue un mapa di Kòrsou por nota ku 75 porshento di aktividat ta tuma lugá den un sierto área so. Mayoria hende ke biba i traha tambe den e área aki. Ta trata di e área rondó di Schottegat ekspandé bai pafó.

“Esaki ta e área prinsipal pa desaroyo i aktividatnan ekonómiko. E motibu dikon ta skohe rondó di Schottegat ta pasobra esaki ta duna sierto seguridat. Esaki pasobra invershon den e área aki ta sigur”, èks bankero, Chesron Isidora, ta duna di konosé.

Segun Isidora, ku ta traha aktualmente komo intermediario entre desaroyadó i bankonan, tin sinembargo otro áreanan ku tambe ta atraktivo pa hasi mas na aktividatnan ekonómiko. Ta kuestion di maneho i desaroyo di tereno di pais ku mester tuma lugá na un otro nivel. Den esaki mester wak aspektonan manera infrastruktura i aksesibilidat na servisio- i produktonan, e ta bisa.

Hendenan ku ta dura normal 30 minüt pa kore di nan kas pa trabou, kisas den futuro lo bai dura 45 minüt koriendo e mesun ruta debí na desaroyonan na otro partinan di Kòrsou. Ta p’esei, Isidora ta bisa ku ta un plan riba término mas largu mester traha pa wak kon ta logra esaki. “Kada pèrmit ku duna ta enserá ku mester krea sierto aktividat huntu ku esaki.”

E industria ku ta sostené turismo ta hopi importante, pero, na su opinion, no tin sufisiente atenshon pa esaki. Un ehèmpel ku Isidora ta menshoná ta entretenimiento ofresé pa hendenan lokal. Tambe sòru ku tin servisionan básiko ku mester ofresé e turista.

“Ta aktividatnan ekonómiko ku empresanan chikí i mikro por ofresé. Esaki ta un sektor hopi faktibel ku ta krea empleo i kaminda hendenan lokal por saka un bon entrada for di dje. Hendenan ku despues kisas por kuminsá nan propio ‘resort’.”

E pregunta ta, sinembargo, kuantu tempu mas lo ta bai tin un kresementu den e sektor di desaroyo di biennan inmóbil (‘real estate’). “Mi ta kere normalmente nos ekonomia ta drai di siklonan di 3 pa 5 aña, pero e kresementu ku ta pasando aden aktualmente ta mas grandi ku normal i e siklo lo ta un tiki mas largu. Pero, unabes pone blòki ta krea un kos permanente.”

Ni maske e kantidat di turista ku ta bishitá Kòrsou baha bèk, e infrastruktura t’ei, loke ta nifiká ku hendenan lo keda bini, segun Isidora. “Si huntu ku esaki keda mantené e nòmber di Kòrsou na haltu e industria lo sigui drai. Wak Aruba i St. Maarten, e turismo por fluktua pero e ta sigui drai.”

Den esaki Isidora ta bolbe mustra ku e sektor di servisio tin konsistensia den dje i na su opinion lo bira e sektor ku riba término largu ta bira unu hopi importante. “Ta bai pa logístika, transporte i otro servisionan. Bo konsentrá riba esakinan bo tin un bon base ekonómiko pa largu tempu.”