KIEV, UKRANIA, AFP.- Presidente Volodymyr Zelensky a bisa djadumingu ku Rusia ta responsabel pa un blackout na ost di Ukrania i a akusá Moscow ku un atake deliberá.
Zelensky a kulpa teroristanan ruso pa un blackout total den regionnan di Kharkiv i Donetsk, i tambe unu parsial den regionnan di Zaporizhzhia, Dnipropetrovsk i Sumy.
E blackoutnan a afektá alrededor di nuebe mion persona, inkluyendo esnan riba teritorionan kontrolá pa Rusia.
E atakenan aki a interumpí servisio nashonal di trein i metro den e parti ost di e pais i tambe e siudat di Kharkiv.
E bosero di Ministerio di Eksterior di Ukrania, Oleg Nikolenko, a bisa ku e atakenan aki tabata un “akto di desesperashon despues di pèrdidanan inmenso i retirada di Rusia for di ost di Ukrania”. E minister di Eksterior a probechá di e momentu pa pidi aliadonan oksidental pa manda mas armanan sofistiká.
E forma kon e trupanan ukraniano a lucha kontra e invashon di Rusia a kue militarnan di Moscow for di base, tresiendo un kantidat di teritorio ku Moscow a kontrolá durante vários luna bèk den man di Kiev.
