LONDON, AP.- E kontienda pa remplasá e promé minister britániko Theresa May no a kuminsá ofisialmente, pero e kampo di kandidato ta oumentando rápidamente. E sekretario di salú, Matt Hancock, a anunsiá djasabra ku e kier purba haña May su puesto, uniendo vários persona mas ku a anunsiá nan postulashon.
May a anunsiá ku e lo renunsiá riba 7 di yüni komo lider di Partido Konservador i a indiká ku e lo fungi komo promé minister interino miéntras Partido Konservador ta skohe un lider nobo den e kontienda ku ta kuminsá otro siman.
Su remplasante mester purba realisá Brexit, un tarea ku May no a logra kumpli kuné durante su tres añanan na e kargo komo promé minister. Ounke el a logra yega na un akuerdo di separashon ku Union Europeo, e plan a drenta tres biaha pa legisladornan den Parlamento. E kuestion ta den un punto polítiko morto.
E kandidato mas konosí pa un tarea hopi difísil ta e eks minister ekstrabagante di Asuntu Eksterior, Boris Johnson, kende a bisa ku e lo saka Gran Bretaña for di UE pa 31 di òktober, ounke ainda no a logra sera un akuerdo ku e lidernan di UE.
