WILLEMSTAD.- Dia 12 di desèmber benidero, e agrupashon di salsa/son Los Compadres de Curaçao ta kumpli 15 aña di eksistensia. Los Compadres ofisialmente a ser fundá 12 di desèmber 2003 i e agrupashon aki tabata tin e honor di por tabata aktivo kontinuo durante tur e 15 añanan aki.
Djadumingu 16 di desèmber di 7 or pa 10 or di anochi na Hemingway (Lions Dive Hotel), esaki lo ser selebrá, ku boutiso di un cd konteniendo e repertorio original di Los Compadres.
Padrinu i Madrina di e cd aki lo ta dos fanátiko grandi di Los Compadres ku ta minister Steven Martina i minister Marilyn Alcalá-Wallé.
Pa medio di esaki Los Compadres ke invitá amantenan di son i salsa en general i e fanátikonan di Los Compadres en espesial, pa ta presente dia 16 di desèmber na Hemingway. E intenshon ta pa tur fanátiko bini bistí na blanku, manera Compadres semper ta bisti.