WILLEMSTAD.- Orfeon Allegro a keda funda pa studiantenan di Maria Immaculata Lyceum, 1966 pa 1968. Despues di nan periodo di estudio na M.I.L., Orfeon Allegro a bira un kor Hubenil independiente forma pa hóbennan di e bario di Otrobanda, fecha 23 di òktober 1968.
Pa konmemorá e echo aki Orfeon Allegro lo tin un programa varia di selebrashon di 50 aniversario.
Djasabra awor, 27 di òktober 2018, Orfeon Allegro lo kanta un Misa Solem pa gradisí Señor na Misa di Sta. Famia pa 7 or di anochi. E programa lo konsistí di: Preis-Messe (Salve Regina) di G.E. Stehle; Ave Maria: J. Arcadelt i kantonan religioso krioyo.
Dia 18 di novèmber 2018 nan lo tin un ‘Dia di Famia’, eksklusivamente pa miembronan korista, nan famia i invitadonan na Landhuis Brakkeput Mei Mei.
Dia 10 di desèmber 2018, Orfeon Allegro ta presentá nan konsierto di Pasku di Nasementu pa gradisí pueblo di Kòrsou na Misa di Sta. Famia. Riba e fecha aki lo tin presentashon di diferente di e kornan konosí di Kòrsou. E konsierto aki lo kuminsá pa 8 or di anochi i entrada ta grátis.
Orfeon Allegro ta bou di direkshon di Sr. Rignald Yankey i organista ta Sr. Johnny Kleinmoedig.