WILLEMSTAD.-  Dia 30 di yüli awor den Hòfi Popo Rojer,  Primintími ta kuminsá ku selebrashon di 30 aña di e kansion. Ta trata aki di un aktividat kaminda e entrada lo ta grátis i tur hende ta invitá pa nan ta presente for di 4’or di atardi te ku 10’or di anochi.

E atardi pa ku e anochi aki lo bira unu super great, pasobra den e  komienso di selebrashon di e kansion Primintími, lo tin presentashon di Karimbo i Dj Wendell Martis di “Cafe con Son pa tur ku ta presente.

Ta trata aki di un kansion ku for di momentu ku el a nanse 30 aña pasá, a bira un éksito i te hasta tabata ganador di e premio Galardon Vitrola.

Historia di Primintími

Primintími a nase bou di un palu di mansaliña na Watamula na Westpunt. Aki e inspirashon a drenta i  ku un guitara a traha e piesa. E mesun anochi ei tabata tin un ensayo di e banda La Clave ei tabata e promé biaha ku nan a pasa Primintími.

Pa loke ta trata e melodianan di tròmpèt, esakinan tabata un idea di Mauchi Alberto ku a inventá e melodianan di bras den e piesa.  Mauchi Alberto mes a yama esaki un “kinder wijsje”. Huntu ku Wotty Ricardo nan tabata e promé nan ku a toka tròmpèt den e piesa aki. Ta bon pa ilustrá ku  ningun di dos no tabata por a lesa músika.

E promé biaha ku e piesa aki a zona na un fiesta tabata e siguiente djasabra na kas di famia Pisas na Banda Bou. E reakshon tabata tremendo. Ta bon pa menshoná ku e tempu ku e piesa aki a kuminsá zona den toká, e no tabata tin letra fiho. Mas bien nan tabata improvisá esaki.

Te hasta a bini representante di un banda musikal na Kòrsou ku a pidi pa bende nan e piesa aki, pasombra nan ta bou di e  impreshon ku La Clave nunka lo a graba e piesa aki. Defakto nan tabata tin rason, pasombra La Clave nunka a graba Primintími, pero si Grupo Nos. Dicho sea de paso La Clave a graba un 45 e tempu ei. E areglo definitivo di e piesa aki a keda hasi pa Papapachi Isenia d.f.m.

Grupo Nos a graba Primintimi

Domingo “Wini” Poulo, outor i intérprete di Primintími, a sigui traha riba e fasilidatnan pa asina ei nan por a graba e kansion aki. Esei a pone ku el a aserká Maduro & Curiel’s Bank pa hasi un fiansa di 20 mil florin pa asina ei e por a graba un LP ( long Play).

Sra. Ella de Medeiros a informá e tempu ei ku MCB no ta fia plaka pa graba disko. Wini Poulo a garantisá sra. De Medeiros ku banko e lo a haña su  sèn bek, loke a sosodé tambe. Sra. Ella de Medeiros a intervení na Banko, pa asina ei nan por a haña e 20 mil aki pa graba.

E grabashon a tuma lugá den studio di Reimi Juliet. Pa kasualidat Papi El Tranquilo tabata presente na studio i riba invitashon di Ronny Martha  ku tabata e konguero di Grupo Nos, a invitá Papi El tranquilo pa e kanta koro.

Na momentu ku e piesa Primintími a sali riba merkado,  tabata tin reakshon  positivo mes ora. Mester indiká si ku tabata tin un radio emisora ku e tempu ei a ninga di toka e piesa aki na radio, argumentando ku e kompositor a falta ku rèspèt pa hende muhé, loke tabata komprendibel pa e tempu ei.

Pa loke ta trata e éksito ku e piesa aki a konosé, mester bisa ku el a hasi un furor den hinter Antias, Aruba i Ulanda.  Tabata tin hopi  diferente presentashon riba Islanan  ABC tur ku éksito Road Manager e tempu ei tabata  Ibi “West” Albertus. Un persona ku semper a sostené e piesa i e banda tabata señor Popo Rojer d.f.m.

Menshon tambe mester ser hasi ku Johnny Oliviera tabata esun ku a bai laga print e disko aki den eksterior. Un danki ta bai na músiko di e tempu ei ku a hasi e piesa aki grandi.  Pa no falta ningun hende  no ta menshoná nan nòmber i na e pueblo ku te awe ta sostené e piesa aki.

Selebrashon 30 di yüli

Mientrastantu djadumingu awor dia 30 di yüli den Hòfi Popo Rojer lo tin komienso di e selebrashon di 30 aña di e kansion Primintími. E aktividat aki lo kuminsá for di 4’or di atardi i lo finalisá 10’or di anochi.

Lo tin presentashon di Karimbo ku lo kompañá Wini Poulo ku a kansion Primintími, pero tambe lo interpretá vários kansion di su kantantenan.  Tambe lo tin presentashon di DJ Wendell Martis di Cafe con Son na Radio Hoyer.

Entrada grátis

Ta bon pa mustra ku entrada pa e evento aki Selebrashon 30 aña Primintími ta grátis. P’esei un invitashonnan bai na pueblo di Kòrsou, pero sigur fanátikonan di Primintími pa nan ta na Hòfi Popo Rojer pa huntu selebrá e okashon aki. Wini ta konta ku bo.