WILLEMSTAD.- Asosiashon Aruba Dushi Tera ku Gran Selebrashon Dia di Himno i Bandera di Aruba ta djadumingu awor.
Manera a bira tradishon e último añanan, e asosiashon di arubanonan bibá na Kòrsou, Asosiashon Aruba Dushi Tera, lo konmemorá i selebrá Dia di Himno i Bandera di Aruba djadumingu awor 17 di mart 2019 di forma festivo.
E selebrashon ta kuminsá 2 or di atardi na Curaçao Airport Hotel ku DJ Atley despues ku animashon di e banda ‘D Edge 509' i nos invitado di honor direktamente for di Aruba “Tommy Lee”
Bar i kushina lo ta bon surtí ku entre otro platonan sukulento arubano manera piská ku pan batí i e famoso “saco” di e bario di San Nicolas.
Entrada ta grátis i por hasi uso di e pisina di hotèl tambe!
Djaluna 18 mart ku ta Dia di Himno i Bandera di Aruba e Santu Sakrifisio di Misa lo tuma lugá na Parokia di Steenrijk pa 7 or di anochi serka pastor Raul Mercedes.
Asosiashon Aruba Dushi Tera ta invitá tur rubiano i tur esnan ku ta stima e pais bisiña pa huntu nos pasa un dushi dia, selebrando himno i bandera di Aruba!.