WILLEMSTAD.- Dia 3 di yüni Passionistas ta selebrá su di dos aña di eksistensia durante e Passionistas Pop-Up Fair. Durante e feria lo tin un programa variá pa mucha i adulto. E evento ta tumá lugá for di 13:00 te ku 18:00 na Sentro Kultural Kòrsou.
Na e feria empresarionan i hòbiista lo bende diferente produktonan artesano, obra di man, kuminda i kos di bebe. Pa muchanan i adulto tin diferente workshop kreativo. Tur bishitantenan di Passionistas Pop-Up Fair lo disfrutá di e dushi ambiente i muzik ku DJ Alana ta bai toka.
Entrada di e feria ta Naf 5 pa adulto i grátis pa muchanan te ku 12 aña. Speshal pa nan selebrashon, Passionistas ta rifa “un goodie bag” bou di e “followers” di nan página di Facebook.
Passionistas ta organisá eventonan i partisipá na proyektonan ku ta ofresé un plataforma na personanan kreativo. Pa mas informashon tokante e filosofia di e fundashon i detaye di e feria, por bishitá e página di Facebook: www.facebook.com/passionistascommunity. Of por yama e number di telefòn 517-6513 i manda un e-mail na info.passionistas@gmail.com.