SOUTH CAROLINA,-  E selekshon di Kòrsou Kampion di Caribe a yega Easley den gran forma pa representá Kòrsou i sobra di Karibe den e kampionato Mundial di Senior League 2018. Despues di a bula primeramente pa Miami, sigui pa Charlotte e hóbennan a kore mas ku 2 ora den bus pa yega finalmente na e universidat kaminda tur e selekshonnan ku ta partisipá den e mundial aki lo hospedá. Manager di e ekipo Nelo Jansen huntu ku su kuerpo tékniko a haña tur splikashon pa ku e reglanan di e universidat pa despues a presentá e hóbennan nan unifòrm ku nan lo hunga aden ku ta un kolo aquamarina masha bunita. Ta bon pa splika ku e organisashon di Little League Mundial ta sòru pa tur loke ta trata uniform, bate, bala, tas pa kada hoben, pues ta bisti e hóben di pia te kabes.

Raphael Heredia , padrino di nos selekshon dunando splikashon dje reglanan dje universidat kaminda e selekshon ta hospedá.

E hóbennan ta sumamente entusiasmá pa ku komienso dje Kampionato Mundial e fin di siman aki. Kòrsou/Karibe su promé kompromiso lo ta djadumingu atardi pero ainda mester determiná kontra kua pais nos hóbennan lo mester sali kontra dje  riba tereno.

Manera ta e kaso semper e selekshonnan ta haña un persona ku ta keda enkargá ku tur loke e hóbennan mester,  e asina yama “ Padrino” kende a bai topa e selekshon na aeropuerto di Charlotte i for di e momentu ei por a nota kon organisá e Organisashon di Little League Mundial ta,  ku tur kos regla i  na ora. Padrino,  sr Raphael Heredia,  a hiba palabra splikando e representantenan di Karibe kiko ta realmente su trabou. Tambe sr Heredia a splika e konfushon di bandera ku tabatin despues ku Kòrsou a titular kampeon di Karibe ku a tuma nota ku e bandera tabata robes manda,  esun di Karibe a bai pa Venezuela enbes di Kòrsou. Venezuela ta e kampeonnan Latino Amérika  aunke mester bisa ku te ku ayera tabatin duda si Venezuela lo presentá.

Hefe di Delegashon  sr Faneite huntu ku Ernst Meyer a gradisí sr Heredia pa e forma kon tur kos a kana e promé dia durante yegada di nos selekshon na Easley South Carolina. Kòrsou ta pendiente pa e promé kompromiso di nos selekshon djadumingu awó pa dje forma ei nos por apoyá e hóbennan ku a pone Kòrsou ariba bou durante kampionato di Karibe aki na Kòrsou den Tio Daou Ballpark.