WILLEMSTAD.- Ayera’nochi e promé parti di selekshon nashonal di futbòl a yega Kòrsou, pa asina inisiá nan preparashon pa e próksimo partidonan di CONCACAF Nations League.

Den e grupo ku a yega ayera tabatin e karanan konosí manera entre otro Leandro i Juninho Bacuna i tambe Tahith Chong, Jeremy Antonisse, Tyrese Noslin, Sherel Floranus i  Juriën Gaari. Pero tambe e dos karanan nobo kual ta Kiyani Zeggen i Kyano Penso a yega ku sobrá di e grupo.

Awe e otro hungadónan ku tabatin wega ayera, ta yega pa asina e grupo por ta kompletu.

Hefe di delegashon Luti Alberto a splika ku awe, lo tuma un desishon riba ku ta bini un remplaso pa Nigel Thomas ku a kai afó pa motibu di leshon.

Awe e programa di selekshon ta kargá. Nan ta kuminsá for di trempan ku desayuno aya na Corendon. Despues pa 11or di mainta nan lo tin un seshon manera ta kustumber kantu di laman. Mas atardi Dick Advocaat i Leandro Bacuna lo ta presente pa rueda di prensa.

Miéntras pa 7or di anochi lo tin un ‘training’ habrí na stadion di Jong Holland.