Riba kaminda pa Mundial na Colombia

WILLEMSTAD.- Den kuadro di e relashon entre Curaçao Baseball Development Foundation (CBDF) i Koninklijke Nederlandse Baseball en Softball Bond (KNBSB), coach Ben Thijssen a logra pa e selekshon di Reino U23 ku ta bai partisipá na e kampionato Mundial na Colombia pasa Kòrsou promé pa un kampo di entrenamentu kòrtiku.

E selekshon, ku ta konta ku vários pelotero di Kòrsou tambe, a yega Kòrsou ayera pa asina kuminsá mesora ku seshon di training i dos wega di fogeo.

E programa ta konsistí di lo siguiente: awe 16 di òktober, training di 10:00-12:30. Mèrdia 3 or nan lo hunga un wega di fogeo (7 Inn.) kontra un ekipo U23 di Kòrsou manehá pa Carlos Pineda.

Djárason 17 di òktober parti mainta U23 di Reino lo train atrobe i anochi 8 or nan lo hunga kontra Sta. Rosa Indians, ku koperashon di gerensia di Tio Daou Ballpark.

Djaweps 18 di òktober, mainta e selekshon U23 lo train i mèrdia/atardi nan lo sali pa Barranquilla, Colombia.

E promé wega di e selekshon di Reino ta programá pa djabièrnè mes dia 19 di òktober kontra di e pais anfitrion, Colombia djis despues di apertura ofisial.

Un total di 12 pais lo partisipá na e kampionato mundial aki. Por sigui tur desaroyo di e kampionato aki via di ww.wbsc.org

Hungadónan di Kòrsou

Algun di e hungadónan di Kòrsou ku ta den e selekshon di Reino U23 ta: Wendell Floranus, Nelmerson Angela, Cedeon Langguth, Stephen Vidal, Sherton Apostel, Junior Martina, Swintly Lint, Aldrich de Jongh, Rachid Engelhart. E roster ta konsistí di 24 hungadó di kual 11 picher, 3 kècher, 6 infielder i 4 outfielder.