WILLEMSTAD.- Un selekshon hubenil femenino di hockey ayera a sali di biahe pa Merka, kaminda lo tuma parti na un torneo titulá “Lucky 7 Shooting Stars”. E hóben selekshon di atletanan te 16 aña. E torneo ta programá di 1 te ku 3 di aprel na Boston.

E diferente gruponan di edat te un kantidat di 36 ekipo a inskribí pa e torneo, representante skolnan for di rònt Merka i tambe un ekipo ‘all-star’.

Kòrsou lo mira akshon den e kategoria di edat te 16 aña i lo hunga por lo ménos 5 partido. E ekipo nashonal di Kòrsou a bin ta train 4x pa siman e último kuater lunanan. Na Merka e deporte di hockey ta kresiendo prinsipalmente komo un deporte pa dama.

Manera ta keda tres’é dilanti, e ekipo ta kla pa e biahe. Tantu e coach komo demas lider i e ekipo a pone komo meta pa logra un mihó resultado posibel, pa di e manera ei representá i promové Kòrsou mas mihó posibel, mustrando e nivel di deporte ku nan ta praktiká na kas. Huntu ku esei, nan ke yuda promové pa deporte di hockey haña mas atenshon na Kòrsou i asina atraé mas miembro.

Afortunadamente a haña un kantidat di spònser ku a yuda pa hasi e biahe ambisioso aki pa Boston. Nan ta: Van Arkel & Luttikhuizen advocaten, Balance Caribbean, Celery, VanEps Kunneman Van Doorne en Spigt Dutch Caribbean.

E mihó deseonan ta bai pa e ekipo, pa nan por tin éksito durante dje torneo.