MERKA.- Djaluna último Selena Gomez a selebrá su di 26 aniversario i a bira mesora e usuario ku mas lihé a yega na 1 mion ‘likes’ ku un potrèt riba Instagram.
Selena su potrèt di selebrashon a kibra e rèkòrt ku anteriormente tabata na nòmber di Beyonce.
Selena a ‘post’ un galeria di potrèt di su fiesta ku e tema ‘Italiano’ riba un yate. E galeria ta kuminsá ku un potrèt ‘close up’ di Selena bistí den un trahe ros, a pèrkurá pa kibra rèkòrt di Beyonce. Selena a logra esaki den apénas 13 minüt. Te na momentu di redaktá e artíkulo aki e ‘post’ di Selena a optené riba 8.6 mion likes.
Beyonce kende tabatin e rèkòrt anterior a logra esaki ku su potrèt kaminda el a anunsiá su embaraso i tambe e potrèt kaminda e ta presentá su ohochinan.
Segun e revista Billboard, e potrèt di Beyonce ku su yunan ohochi a optené 7.8 mion ‘likes’ den un espasio di 12 ora, miéntras ku e anunsio di su embaraso a logra 6.4 mion den algun ora.
Selena a surpasá Beyonce tambe riba e lista ‘Hopper HQ 2018’ pa e hendenan mas riku riba Instagram. E kompania ta basa esaki riba e kalkulo di loke e artista por kobra pa promové un produkto via ‘post’. Selena por kobra 800 mil dòler, miéntras ku Beyonce por hasi e promoshon na balor di 700 mil dòler pa ‘post.
E úniko persona ku Selena no por a gana ta Kylie Jenner ku segun kalkulo por kobra 1 mion dòler pa kada ‘post’.