Selekshon nashonal di Kòrsou ayera nochi a logra un viktoria grandi di 10-0 riba Grenada, loke sigur ta asentuá e progreso den futbòl na nivel di selekshon. Esaki, lagando un banda e nivel di Grenada.

Pero miéntras ku F.F.K. a traha duru pa progreso di selekshon, ta un pregunta si a kòrda ku “den kas” tambe mester traha pa bai dilanti i tambe duna rèspèt.

Mundu Deportivo ke referí spesífikamente na e trato ku F.F.K. a duna na prensa, a lo ménos na EXTRA, relashoná ku e partido di ayera nochi. Entrada mester tabata ku ‘badge’ spesial i prensa mester a solisitá e ‘badge’ pa mas tardá djaweps 6 di sèptèmber. Manera semper, EXTRA ta kumpli i a hasi esei. Pero no ta tende nada di parti di FFK i ayera mainta ku a bai tuma ‘badge’, ta resultá ku mester bai bèk FFK 3 or pa haña esei. Ta yega 2:45 or i ta warda te 4 or, sin por haña haña ‘badge’ i ta bisa ku “e ta na kaminda”. Otro medio i demas persona ku tabata presente ta kuminsá tuma number di telefòn pa nan yama puntra ki ora ‘badge’ ta yega. Otro ta tende ku nan lo haña esei na porta promé ku wega.

Nò, EXTRA no ta kai den e kategoria di mendigá pa entrada. Nos no ta bai para na porta di stadion i pidi pa yama ningun hende pa bin bisa ku nos tin mag di drenta stadion pa kubri wega di nos selekshon di futbòl.

Nos no ta eksigí nada, pero a lo ménos a spera ku F.F.K. lo krese pareu ku selekshon. Awe nos tin relato di e wega, pasobra EXTRA ta respetá nos lektornan i nan ta spera di haña e resultado, ounke no na e manera di kustumber. Lamentabel ta ku nos no por kompañá e relato ku potrèt, ya komo ku reportero i fotógrafo di EXTRA ta eksigí mas rèspèt pa nos trabou.

Ban spera ku lo tin mehoransa pa e wega di novèmber próksimo kontra Guadeloupe.