WASHINGTON, USA (AFP).- Senado di Merka a aprobá 60.000 mion dòler den finansiamentu pa Ukrania, pero e proyekto di lei ta kore riesgo di no keda aprobá pa Kámara di Representantenan, di mayoria republikano, segun a keda adelantá pa su presidente Mike Johnson.
E pakete aki di 95.000 mion dòler ta inkluí finansiamentu di yudansa militar pa Israel i su aliado stratégiko, Taiwan, pero gran parti (US$60.000) ta destiná pa re-abastesé Ukrania den su reservanan di munishon, arma i otro nesesidatnan krusial ora ku ta drenta e di tres aña di invashon ruso.
E proyekto di lei, ku Senado a aprobá den oranan di djamars mardugá i ku a keda aprobá pa tantu demokrat- komo republikanonan, no ta inkluí kambionan den e polítika migratorio norteamerikano, algu ku republikanonan a pidi.
Un teksto anterior di Senado ku tabata referí na tantu kuestionnan migratorio komo yudansa eksterno pa aliadonan, a keda blòkiá pa legisladornan republikano, despues ku Johnson a bisa di lo anul’é den Kámara di Representantenan pa motibu di ta konsiderá ku e no ta sufisiente estrikto pa para e entradanan ilegal na fronteranan.
“Republikanonan di Kámara di Representantenan tabata bon kla for di kuminsamentu dje diskushonnan bisando ku kualke lei suplementario di seguridat nashonal mester rekonosé ku seguridat nashonal ta kuminsá na nos fronteranan”, segun Johnson a bisa den un komunikado.
Johnson a bisa anteriormente ku e promé proyekto di lei di Senado, ku ta inkluí algun dje restrikshonnan mas duru den dékadanan na e inmigrashon, segun e tòg no tabata sufisiente leu i komo tal “lo yega morto” serka Kámara di Representantenan.
Su retórika ta koinsidí ku esun dje èks-presidente Donald Trump (2017-2021), kende a pidi di forma enérgiko pa rechasá e proyekto di lei miéntras ku e ta trahando riba su postulashon nobo pa presidensia, turesten e ta prepará pa ataká e supuesto debilidat dje presidente aktual i su potensial rival demokrátiko Joe Biden, riba asuntu di inmigrashon.
