WILLEMSTAD.- Fondo Winthrop Curiel resientemente a hasi un gesto na Akademia di Músika Edgar Palm (Sentro Kultural Kòrsou).
E fondo a logra pone kontakto entre e konservatorio na Texas i Sentro Kultural Kòrsou.
Sra. Carolina Nicolaas, mènedjer na e skol di músika Sentro Kultural Kòrsou a bishitá TCU pa sera konosí, ku koperashon finansiero di e Fondo Winthrop Curiel.
Durante un siman sra. Nicolaas ku koperashon di e konosido  pianista yu di Kòrsou Prof. Harold Martina, ku ta dosente di muzik klásiko a bishitá e konservatorio na Texas pa sera konosí;
Sra. Nicolaas a presensiá diferente masterclass i lèsnan didáktiko i pedagógiko na e konservatorio.
Tambe el a presensiá e Latin American Music Festival  di muzik klásiko di Latino Amérika di kual Harold Martina i otro pianista mundialmente konosí Blanca Uribe, a partisipá ku obra   di kompositornan di Latino Amérika.
Sra. Nicolaas a bisa ku e lèsnan ku el a presensiá ta hopi bon pa konosé desaroyonan moderno i  nobo ku lo por introdusí na studiantenan di muzik na Kòrsou i el a traha un relato di tur loke el a eksperensiá i ku ta hopi balioso pa nos.
Riba e potrèt por mira e momentu ku sra. Nicolaas a entregá su relato na presidente di Fondo Winthrop Curiel, sr. Rudy Wijngaarde, huntu ku su koleganan Michael de Sola (sekretario/tesorero) i Winthrop Curiel (miembro), den kompania di direktor di Akademia di Músika Edgar Palm, sr. Elvio Cijntje.
E meta di Winthrop Curiel Fonds ta apoyá e hóben talentoso músikalmente den su desaroyo artístiko. Esaki ta sosodé dor di duna sosten finansiero pa kurso, kompra di instrumentonan adekuá,  sigui kurso di muzik i baile na esnan ku no tin e medio finansiero. Ku e sosten aki hóbennan músiko  por konkretisá nan pashon.