WILLEMSTAD.- Dia 1e di mart último e temporada ofisial di Miss Curaçao Teenager 2018 a kuminsá. IBFF e aña aki ta selebrando e di 15 aniversario di MCT i p’esaki ta trahando riba un magno evento huntu ku nan partner- i spònsernan ku ta kere den e kalidat ku e proyekto aki ta ofresé i ta kere den e edukashon i formashon balioso ku e hóbennan ta haña na momentu ku nan partisipá na e sertámen.
E reunion ku mayor i kandidatanan huntu ku fundadó di MCT, Aubrey America i Miss Teen International 2000 i Miss Kòrsou 2002, Ayanette Statie a tuma lugá kaminda a duna tur detaye di e sertámen dje aña aki i e trayekto di edukashon i formashon.
E 7 kandidatanan pa e sertámen di Miss Curaçao Teenager 2018 ta: Chrissainy Pieternella, Ceannah Thokaai, Naisha Bautisma, Ana-Clara Jansen, Shanique Alberto, Luigainny Asjes i Danique de Graaf.
E hóbennan a eksperensia un seshon di fotografia ku Sr. Nestor Zavarce, fotógrafo ofisial di MCT p’e aña aki. E fotonan lo sirbi pa entre otro kuminsá promové nan imágen riba medionan sosial. Sigui bo partisipante faborito riba e página di IBFF, riba nan página personal i keda pendiente pa e galeria di potrèt pa vota pa Miss Internet 2018.