WILLEMSTAD.- Den kuadro di e inougurashon di Interpark na Kòrsou, e organisadónan a prepará pa djadumingu próksimo, dia 16 di yüli un tremendo “Sera Konosí ku Interpark”. Esaki ta tuma lugá di 6’or pa 9’or anochi riba tereno di Sambil.  E lugá ideal pa un atrakshon familiar di e magnitut aki.

Durante e atardi di djadumingu dia 16 awó, tur hende por subi tereno di Sambil i mira tur e aparatonan di aserka i mira nan den akshon. Por presensia masha di aserka kon bunita e Parke a keda i ya tur hende por bai notando kual ta e atrakshonnan ku nan  lo kier drenta una bes ku e parke habri su portanan.

Interpark ta ofresé atrakshonnan pa grandi i chikí i manera e organisadónan a bin ta bisa, esaki ta bira e parke mas elektrisante ku a yega na bishitá Kòrsou. Un variashon amplio di aparato pa grandi i chikí i  den nan, atrakshonnan Ekstremo. Tin atrakshonnan ku ta hiba bo laira na un altura di 50 meter!.

Djadumingu tambe, un i tur ku bishitá e parke Interpark por mira e lokual a bin ta bisa ya pa basta tempu ku ta bai tin un sorpresa masha masha agradabel!. Entrada pa djadumingu awor na e sera konosí ku Interpark ta grátis. Lo tin músika i e bar i kushina lo ta bon surti.

Ta bon pa menshoná ku djadumingu awor “No Por Drenta E Atrakshonnan” !, ta simplemente un “Sera Konosí” e atardi ta bai ta. Interpark ta habri su portanan definitivamente djamars dia 18 di yüli pa 6’or di atardi pa públiko.

Interpark ta habrí di djamars pa djabièrnè di 6’or di atardi pa 11’or di anochi. Djasabra di 4’or di atardi pa 12’or di anochi i djadumingu, di 11’or di mainta pa 11’or di anochi.

Keda pendiente paso Interpark definitivamente ta bai ta e atrakshon familiar di mas impreshonante ku Kòrsou ta konosé i hinter famia ta keda invitá. Refresko BUSTA ta invitá bo.