WILLEMSTAD.- Pa selebrá 60 aña di Royal Scorpions, Mr. Baseball, e dos titannan di merengue Sergio Vargas i Rubby Perez lo ta huntu na Kòrsou riba un tarima pa Fiesta Bomba.
Sergio Vargas i Rubby Perez ta konosí pa nan hazañanan den farándula durante añanan 80. Tur dos a bishitá Kòrsou na vários okashon i kada biaha di nobo a malkriá e grupo grandi di fanátikonan k’un tremendo presentashon.
Djabièrnè 29 di mart lo no ta diferente ora ku Sergio presentá ku respaldo musikal di e gran orkesta Dreams i Rubby kanta tur su hitnan ku kompañamentu musikal di E.R.A. Un fiesta ku ta primintí di bira un anochi di kita sombré den Elsio Resort na Wiriweg, Sta. Rosa.
Karchinan ya ta na benta serka miembronan di Royal Scorpions, Mensing’s Caminada i na Beep Beep. Pa e sekshon general karchi ta 75 florin òf 100 florin ku 4 bibida inkluí. Lo tin dos sekshon VIP Gold i VIP Diamond. Pa informashon i karchi por yama 519-2192, 510-1676, 517-9433 òf 522-7253. E aktividat ta un ‘fundraising’ pa Royal Scorpions, Fundashon Mayor di Kriansa, Los Paranderos i Grupo di Seú Wapa pa Nos Bai.
Konsiderando ku e fanátikonan na Kòrsou di tantu Sergio Vargas komo Rubby Perez Pues ta bastante, ta rekomendabel pa bo buska bo karchi fo’i tempran, pa bo no keda fo’i dje tremendo ambiente den Fiesta Bomba, djabièrnè 29 di mart.