"Apesar di e situashon difísil ku Kòrsou ta pasando aden aktualmente
Por disfrutá di e show online i sostené e 8 partisipantenan"

WILLEMSTAD.- Na nòmber di International Beauty & Fashion Foundation (I.B.F.F.), mi persona, Ayanette Statia, nos embahadora di hubentut aktual, srta T’keyah Eugenio i e 8 partisipantenan pa Miss Curaçao Teenager 2020, nos ke informá pueblo di Kòrsou, ku e sertámen final a kambia di fecha debí na e situashon di covid-19 i tur e medida nan ku gobièrnu di Kòrsou a stipulá pa dominá e situashon.

E fecha nobo pa e anochi final di Miss Curaçao teenager 2020 lo ta djasabra, 6 febrüari 2021, 7’or anochi for di sala di PWFC multi-functional center.

Pa por garantisá un show di nivel haltu i hiba un maneho responsabel i kubri tur e gastunan durante e situashon difísil ku Kòrsou ta pasando aden, e anochi final di Miss Curaçao Teenager 2020 lo ta online via ‘Pay Per View’!

Por kumpra un V-ticket (virtual ticket) serka kada partisipante ku un kódigo úniko i sigui tur instrukshon pa asina aktivá bo kódigo pa bo por disfrutá di e show kaminda bo ta deseá riba bo telefòn, tablèt, laptòp, kòmpiuter òf smart tv.

For di momentu ku  bo kumpra bo V-ticket, lo bo risibí guia i informashon te na momentu ku e show finalisá dia 6 di febrüari 2021.

Tin un kantidat limitá di Early birds ku por kumpra únikamente serka e 8 partisipantenan te ku 31 di dezèmber 2020. Entrante 1 di yanüari 2021, e V-ticket su preis lo subi.

Probechá kumpra bo v-ticket pa bo sa ken ta bai bira e embahadora di hubentut nobo i sinta disfrutá di un tremendo produkshon den trankilidat di bo kas i asina sostené nos hòbenan.

Huntu ku Scarlet Zalm lo tin artistanan invitá ku ta bai hasi e totalidat muchu mas kampion. Sigui tur desaroyo atrabes di nos páginanan sosial pa bo ta bon informá.

Apesar di tur e situashon fèrfelu, nos mester keda sostené nos hóbennan. E eksperensia aki sigur ta kontribuí na formashon di damanan profeshonal pa futuro di nos dushi isla.

Danki na tur nos spònsernan ku den e aña di hopi reto aki tòg a konfia den I.B.F.F. Sin persona manera boso, tur esaki no ta posibel! Revlon, Cspirit, Leo sound and lighting, Nestor Zavarce, Chilbert Catering, Krus Kòrá Kòrsou, Geonella Sandries, Inspiracion Curaçao, Ruchandry Straker, LAPD Curaçao, Les Cheveux, Obelysque, Charms Accessories Curaçao, Royal Rentals, Tv Dirèct kanal 13, Skin Beauty Center Curaçao, Prime Restaurant i SH social media.