HERUSALEM, AP.- Servisio di seguridat interno di Israel a haña aprobashon di gabinete pa kuminsá desplegá medidanan antiterorista i asina yuda kontené propagashon di e vírus nobo na Israel. asina e direktor di e agensia a bisa djamars.
Nadav Argaman, direktor di e agensia Shin Bet, a rekonosé ku si usa e kapasidatnan aki e lo desviá e mishon prinsipal di e entidat kual ta pa lucha kontra terorismo, pero el a sigurá ku ainda e mishon general ta keda pa “salba” mas tantu “bida” posibel.
El a bisa ku lo bini un supervishon estrikto pa garantisá privasidat di e individual i ku e operashon lo usa geolokalisashon di selular i uso di tarhetanan di krédito pa alerta posibel personanan eksponé ku e vírus, i no pa forsa niun hende pa keda den karentena.
E medida a wòrdu anunsiá pa promé minister Benjamin Netanyahu komo parti di un serie di medida ekstenso pa atendé ku e brote. E medida a generá preokupashon entre defensornan di libertat sivil indikando ku e práktika ta violá privasidat.
