FRANSIA.- E inisio di ‘El Dorado World Tour’ a keda posponé un biaha mas. Shakira a plama e notisia via di medionan sosial indikando ku pa e último dianan e tabata hopi enfoká pa rekuperá di un malestar na su kuèrdènan vokal.
E kantante a sigui splika ku e tabatin speransa ku lo e por a rekuperá pa por a kanta na Paris, pero ku esaki no ta posibel i ku su dòkternan a dun’e konseho pa sigui deskansá ku kuèrdènan vokal.
Siman pasa pa promé biaha e kantante a hasi menshon riba e posibilidat pa posponé e insiso dje tour. Shakira a sigurá su fanátikonan ku e ta ansioso pa subi bèk riba tarima i pa e ta 100% pa nan. ‘Ku poder di Dios boso lo mira mi pronto pa duna inisio na e tour’, asina e kantante a terminá su mensahe.
Tour di Shakira lo mester a kuminsá na Fransia i sigui pa Luxemburg, Bèlgika, Ulanda, Spaña, Portugal, Italia, Alemania, Suesia pa despues e presentá na diferente estado na Merka i Canada.