WILLEMSTAD.- Wikènt último, dianan 25 i 26 di yüni, Federashon Biyar Kòrsou a organisá su evento individual mensual. E biaha aki tabata turno di e disiplina  bola 10. Bintikuater biyardista a partisipá na e evento ku a konta ku patrosinio di Montana Bierhuis i House of Billiard Play. E ultimo dos hungadónan ku a keda den buèlta di ganador tabata Fauzi Halaby i Jeffrey Nieuwenhuijzen. E ultimo aki a bai ku e viktoria ku skor di 7 pa 2 i a pasa pa final.

Pero.....e show e biaha aki tabata den man di e eks kampion hubenil i aktualmente un di e topnan den divishon mayor. Ta referi na Shamir "The Automatic" Tremus. Nuebe partido e ta hunga, kual e promé e ta pèrdè pa default. Asina'ki e ta resultá den buèlta di pèrdèdó. Un hungadó hóben, fuerte i ku kurason pa sobrebibí situashonnan difísil. Shamir ta gana un tras di otro kuminsando ku Nazeer Approo 7-2, Sybren Boekhoudt 7-3, Alun Huang 7-4, Karl Vervuurt 7-2, Gemajel Rol 7-4, Fyrich Benschop 7-6.  Den semi final Fauzi Halaby 7-3 i den final Jeffrey Nieuwenhuijzen 8 pa 3. Sin laga duda un tremendo aktuashon.

E posishon final: empate na puesto 5 Salim Kuzi i Gemajel Rol, nr. 4 Fyrich Benschop, nr. 3 Fauzi Halaby, sup kampion Jeffrey Nieuwenhuijzen i kampion Shamir Tremus.  Federashon Biyar Korsou ta felisitá tur e finalistanan spesialmente Shamir ku su tremendo prestashon.