MERKA.- Resientemente Shandrelica Casper a gradua ‘Magna Cum Lauda’ na Los Angeles College of Music na Pasadena, California. Dje forma aki Shandrelica ta logra su ‘Bachelor in Music Performance specializing in Vocal Performance’. Shandrelica no ta un deskonosí aki na Kòrsou. Biní for di un famia musikal, kaminda mama ta kantante i e tata un músiko, Shandrelica for di 7 aña a kuminsá toka perkushon chikí. Despues Shandy a kuminsá toka drùms i diferente otro instrumènt di perkushon. Un di su mihó talentonan ta toka i kanta alabes. Promé ku Shandy a bai studia na Los Angeles e la forma parti di diferente festival, entre otro Curaçao North Sea Jazz Festival kaminda el a toka perkushon chikí ku ‘Pernell Saturnino & Friends’. Studiando na Merka, Shandy ta sera konosí ku Eva Zmijewska i huntu nan ta start e proyekto musikal ‘Shandy & Eva’. For di 2015 nan ta presentando huntu i e proyekto a hiba nan na diferente parti di Merka, Polonia i tambe aki na Kòrsou. Pabien na Shandrelica Casper ke logro!.