WILLEMSTAD.- Shareley Fraaij, Nubian Model Queen 2016-2017 lo representá Kòrsou na e sertámen di Global Charity Queen na Taiwan.

Den wikènt pasa, nos Nubian Model Queen 2016 - 2017, Shareley Fraaij a biaha pa Taiwan kaminda lo e representá Kòrsou den e sertámen: Global Charity Queen 2017. Esaki ta e promé biaha ku Kòrsou ta keda representá den e sertámen aki ku ta konta ku partisipashon di 60 pais.

Un di e metanan di e sertámen aki ta pa fomentá obranan karitativo pa esnan ménos afortuná den komunidat. Shareley Fraaij ta un dama bunita, karismátiko, simpátiko i inteligente i sigur lo ta un digno representante ku lo laga un bon impreshon komo tambe promové nos dushi isla Kòrsou. Global Charity Queen 2017 na Taiwan ta kargá ku diferente aktividat pa tur e kandidatanan i nan lo tin un skedjel hopi okupá i varia riba e península di Penghu.

Durante di e sertámen final lo bai tin tres presentashon ku ta trahe nashonal, trahe di baño i trahe di gala. E show di talento lo ta unu preliminar. Durante e show di talento Shareley Fraaij lo lusi un trahe inspirá riba seú di Kòrsou, diseñá i konfekshoná pa e hóben Sowensly Gijsbertha. Pa su presentashon den trahe Nashonal, Shareley lo lusi un trahe inspirá riba nos Blenchi.

Un diseño di e hóben yu di Kòrsou Angelo Schmidt, kende tambe a konfekshoná tantu e trahe nashonal komo esun di gala.

Un danki spesial na un i tur ku di un forma òf otro a duna nan apoyo i sosten pa e partisipashon di Kòrsou den persona di Shareley Fraaij na Global Charity Queen 2017 na Penghu, Taiwan. Dutch Pageant Group ta deseá Shareley tur klase di éksito i ke pidi pueblo di Kòrsou kompleto i na tur yu di Kòrsou biba na Ulanda pa ban duna sosten na nos representante mandando nos bon vibrashon, energia positivo i orashon pa tur kos bai bon.

Riba e Facebook página di Dutch Pageant Group òf Alex Martijn pa por keda informá di tur e desaroyonan di nos representante den Global Charity Queen 2017 na Taiwan.