Sharon Meyer koroná ‘Miss World Curaçao 2019’

WILLEMSTAD.- Djasabra último den Acoya Curaçao Resort, Sharon Meyer di 24 aña di edat a keda koroná komo “Miss World Curaçao 2019” pa su susesora Nazira Colastica.
Sharon Meyer a nase na Kòrsou dia 2 di desèmber 1994. Despues di a terminá su estudio na Peter Stuyvesant College e la bai Stony Brook University na New York, kaminda el a studia Finance i Political Science. Tambe el a hasi Business honors program.
Sharon lo sali Kòrsou dia 19 di novèmber próksimo rumbo pa London, Inglatera na unda e sertámen di Miss World 2019 lo tuma lugá.
E aña aki 130 partisipante di rònt mundu lo kompetí pa e korona di Miss World. Manera ta konosí e sertámen di Miss World no ta un sertámen ku solamente ta konsentrá riba e beyesa físiko. E organisashon tin un formulá diferente pa skohe mundu su representante di beyesa.
E partisipantenan lo kompetí den diferente kategoria manera: Multimedia, Deporte, Talento, Top Model, “Head to Head Challenge” i “Beauty With A Purpose”.
Kada partisipante ku resultá e ganadó di un di e kompetenshanan lo klasifiká pa forma parti di e Tòp 30 pa e final Miss World 2019 kual ta dia 14 di desèmber 2019.
ReProD ta felisitá Sharon Meyer komo Kòrsou su Miss World 2019 i ta dese’é tur klase di éksito pa ku su preparashon pa e prestigioso sertámen Internashonal.

SHARE

LEAVE A REPLY