Shete baluarte nobo den Salon di Fama FDOK

Deporte

WILLEMSTAD.- E fecha 6 di aprel ta bira esun ofisial pa entrada di baluartenan di deporte nashonal pa drenta Salon di Fama di FDOK. Esei ta lokual ku presidente Jean Francisca a duna di konosé ayera nochi na Marriott Hotel, na okashon di instalashon di shete (7) miembro nobo.

...Jean Francisca; presidente FDOK...

Señoranan Aminta Sprockel, Yeanne Yvette Lopes, Sherry Howell i señores Siechnar Djaoen, Frits Meursing, Anthony Leito i Hubert Janzen a keda instalá komo koronashon di un eksitoso karera den deporte di nos pais.

Francisca a trese dilanti ku nan a aseptá un proposishon di Percy Pinedo pa den futuro realisá e instalashon riba 6 di aprel, ku ta dia internashonal di deporte. FDOK a bai di akuerdo ku esei i a hasi e preparashon pa e aña’ki mes, pero pa motibu di ‘lockdown’ finalmente e no por a tuma lugá. Ta e intenshon pa entrante 2022 si esei ta e kaso.

Mas aleu e presidente di FDOK a referí na e veredikto resien na Laussane, Suisa, den e kaso ku FDOK a entamá kontra di IOC. Francisca a trese dilanti ku ainda FDOK no a risibí e veredikto por eskrito. Tabata mas ku un dékada ku a bin ta bringa e kaso, di kua e inisio no a bai fásil. Finalmente, mayoria federashon di deporte aki na Kòrsou a djòin e lucha i tambe e gran mayoria por kompetí tantu den region komo internashonalmente.

Awor aki e preparashon ta sigui pa Kòrsou por ta presente den Weganan Panamerikano (Panam Sports) di 2023.

...Sithree v. Heydoorn; Minister enkargá ku deporte...

Mas rekonosimentu

Minister Sithree van Heydoorn, di su parti, a trese dilanti ku mester tin mas informashon riba tipo di aktividat manera instalashon den Salon di Fama. E ta na fabor pa invitá skolnan pa di e manera ei nos hóbennan por haña informashon korespondiente. “Mester traha riba konsientisashon di nos nobenanan. “Gobièrnu ke duna un inyekshon den esaki i ta spera ku aki 2 siman lo por hasi un anunsio ku sigur ta trese hubilo relashoná ku e tema aki”, segun e mandatario a duna di konosé.