MERKA.- Shete di e dies videoclipnan mas mira den 2017 riba YouTube ta di artistanan Latino, di kua esun mas popular ta ‘Despacito’, e éksito ku e portorikeñonan Luis Fonsi i Daddy Yankee a kombertí den e video mas mira den historia dje plataforma, asina e kompania a informá ayera.
Seis di 10 ta kanta na spañó, loke ta konfirmá e asenso di muzik Latino riba nivel internashonal, esaki danki na ‘Despacito’ i ritmonan urbano.
Apart di Fonsi, e kolombiano J Balvin ta na di tres posishon ku e kansion ‘Mi Gente’ ku a alkansá 1000 mion di ‘views’ den solamente 103 dia, loke ta hasié e di 4 video ku a alkansá e kantidat di ‘views’ mas lihé den historia dje plataforma.
Otronan ku tambe ta den e Tòp 10 ta J Balvin i Willy William. Maluma ku ‘Felices los 4’, un dje 4 videonan ku a superá 1000 mion ‘views’ riba YouTube, inkluyendo su kolaborashon ku Shakira i Ricky Martin.
Bruno Mars, e kantante di orígen portorikeño, di kua su nòmber ofisial ta Peter Gene Hernandez, ta na di 5 lugá ku e videoclip ‘That’s What I Like’.
‘Ahora Dice’ di Chris Jeday huntu ku J Balvin, Ozuna i Arcangel tambe ta forma parti dje Tòp 10 huntu ku Nicky Jam kende ta na di 7 lugá ku ‘El Amante’. E lista ta sera ku Enrique Iglesias ku e number 10, ‘Súbeme la Radio’.