Churandy Martina lo ta kargadó di bandera    

WILLEMSTAD.- Un kantidat rèkòrt di shete (7) atleta di Kòrsou ta figurá den e delegashon di Hulanda ku lo hasi e biahe pa Tokyo pa tuma parti na e XXXII Weganan Olímpiko di I.O.C. E weganan, ku ofisialmente ta bai den historia komo Tokyo 2020, lo atraé den kareda di 11.000 atleta pa kompetí den 33 diferente ramo di deporte.

Den fin di siman último Hulanda a anunsiá su delegashon kual ta konta ku riba 200 deportista, entre nan shete yu di Korsou ku lo forma parti dje grupo di kuarentisinku atleta di ‘track and field’. Un nota di atenshon spesial ta e hecho ku Churandy Martina (37 aña) lo ta un dje kargadónan di bandera di Hulanda, huntu ku e hóben Keet Oldenbeuving (skateboarding).

Churandy Martina lo partisipá den su di sinku Weganan Olímpiko. Un trayekto ku a start na Atenas 2004 i a sigui pa Beijing 2008 (ámbos pa Antia Hulandes), Londres 2012, Rio de Janeiro 2016 i awor Tokyo 2020(1)

Pa e okashon aki Martina lo ta den e team di relevo 4x100m. Individualmente su mihó tempu e temporada aki riba 100m ta 10.39 sekònde, ku el a kore na Vugt, Hulanda. E team di relevo mas aleu ta konta ku presensia di eks-pelotero profeshonal Christopher Garia, kende su prestashon mas notabel dje temporada aki ta 10.34 sekònde ku el a kore na Hengelo. Hensley Paulina tambe ta den e team di relevo 4x100, ku su 10.46 sekònde ku el a marka na Breda.

Taymir Burnet ta e di kuater yu di Korsou den e team di 4x100 meter, pero ta bini aserka ku Burnet ta figurá den e grupo di atletanan ku a keda konvoká pa 200m i esei danki na e 20.62 sekònde ku el a marka e temporada aki riba e distansia. Su puesto nr. 49 riba ‘world ranking’ a habri kaminda pa el a risibí e invitashon. Pa loke ta 100m., su mihó tempu di 2021 ta 10.39 na Vugt.

Mas aleu Kòrsou ta konta ku tres atleta den karedanan di 400m. Liemarvin Bonevacia a gana su invitashon riba 400m individual, pero tambe ta kore e relevonan 4x400m maskulino i 4x400 miksto. Bonevacia ta nr. 23 di mundu riba ranking mundial i pa e motibu ei su invitashon pa kore 400m.

E di dos atleta riba e distansia ta Terrence Agard kende ta den tantu e team 4x400 maskulino komo esun miksto. E tabata den e team ku e aña aki a kore 46.09 sekònde na Breda.

Por último ta figurá esun mas hóben, Ramsey Angela, ku ta un atleta di ‘hurdles’ 400m. Pero den e kaso aki su bon prestashon riba e distansia a dun’e un sitio bon meresí den e teamnan di relevo 4x400 i 4x400 miksto. E aña aki el a marka 46.37 sekònde riba 400m na Bèlgika i 49.35 riba 400 ‘hurdles’ na Suisa.