ORANJESTAD.-Awe mèrdia pa mas o ménos 2:40 sentral di polis a haña notifikashon di un aksidente grave ku a tuma lugá riba e kaminda di Warawara na Santa Cruz. E promé informe ta indiká ku un pick-up mester a bòltu i e shofùr ta pega bou di e vehíkulo.

Mesora a dirigí un patruya di polis, ambulans i brantwer pa e sitio di e aksidente. Na yegada ta topa ku un pick-up marka Toyota modelo Hilux, kolo shinishi, ku un persona pega bou di dje.

Polisnan ku a yega na e sitio a logra saka e shofùr i personal di ambulans a duna e shofùr asistensia médiko, pero lamentablemente no por a hasi nada mas pe.

Spesialistanan di tráfiko i tambe polis tékniko a presentá pa asina hasi nan investigashon. Despues di un ratu médiko forénsiko dr. Voskuil a presentá i a konstatá morto di Eduardo Thiel nasi na Aruba dia 29 desèmber 1970 (54 aña). Lamentabelmente esaki ta bira e di 10 morto den tráfiko.

Kuerpo Polisial ta manda palabra di kondolensia na famia di e defuntu. Tambe polis ta hasi un súplika na tur outomobilistanan: Ta desèmber e luna mas drùk di aña, hopi drùk i esaki ta nifiká pone MAS atenshon, sigui reglanan di tráfiko, manehá sigur i NO tin pura.