WILLEMSTAD.- Djasabra awor, 7 di mart 2020,  a habri un oportunidat mas pa inskribí e mucha i tinernan pa e kursonan di Akademia ShowBizz X-Treme.
Selebridatnan, artista i karanan masha konosí no na Kòrsou so, pero na vários parti di  mundu ta bai fungi komo dosente den e kursonan di Academy ShowBizz X-Treme by Danny Yanga.
Pa menshoná algun di nan: Nataly Antonia, Tito Doran, Jessica Damon, Pachi Damon, Darwin Gregg, Dibo Doran, Mraiz, Suzy Koko, Noruedino Serboneij, Solange Sambo, Mercee Doran, Lady Su, Giovany Abath, Finchi Statie, Jhuriel Plantijn, Elia Isenia i hopi artista i selebridatnan mas.
Den e kursonan aki e mucha i hóbennan lo risibí kada siman diferente faseta di loke ta trata e mundu di ShowBizz. Kada un dosente kalifiká ta bai duna e kursonan  e.o. den presentashon na radio i televishon, kanta, baila, aktua, etikèt, modelá, disiplina i mas.
Danny Yanga ku ta na kabes di e Akademia ta sigui duna su kursonan tambe. Dia 14 di yüni 2020 ta sera e 4 lunanan di kurso ku un bunita show den WTC ku tur partisipante i e invitashon na tur e dosentenan di e kursonan pa presensiá e show den WTC.
Kòrsou tin hopi mucha ku tin talento i ta kla pa ekspresá esaki. Akademia Danny Yanga ta invitá tur mayor pa bini i inskribí e muchanan i tuma informashon tokante e kursonan i ku sigur ta yuda e muchanan den nan desaroyo i krese den nan talento.
Inskripshon pa forma parti di ‘Showbizz X-Treme by Danny Yanga’ ta tuma lugá djasabra awor entre 10 or di mainta pa 12.30 or di mèrdia na Kura di Arte dilanti di Katerdal di Pietermaai.
Pa mas informashon por yama 521-3700 òf 560-6225.