WILLEMSTAD.- E obra teatral ku a hasi hopi impakto na Hulanda ‘Shrew Her’ lo estrená djaweps 28 di novèmber na Hòfi Cas Cora. Dramaturgo i direktor Ira Kip a adaptá Shakespeare su kontroversial: Taming of the Shrew.
For di un perspektiva seksodiverso (queer), Ira ta eksplorá si e strukturanan matrimonial tradishonal ainda ta relevante den nos sosiedat? I en partikular den komunidat LGBTQ+. Tumando na kuenta tambe kon mundu digital ta influensia strukturanan sosial.
Kiko ta identidat di género (gender identity) i kon nos por redefiní esaki den siglo 21? Kiko nos ta gana ora nos bira parti di un instituto matrimonial i un sistema? Ku e preguntanan aki den mente Ira Kip huntu ku 5 aktor LGBTQ, kontando nan eksperensia personal, ta eksplorá nan ‘gender identity’ den Shrew Her.
Ira Kip, konosí na Kòrsou i Aruba komo un di e fundadónan di e proyekto pa hóben ‘Art Rules’ ta trese un obra multidisiplinario ku influensianan di músika di Dancehall, Moda i Medio Visual. ‘Shrew Her’ ta invitá públiko pa partisipá i forma parti di e obra. Na final di e show tin un follow-up kòrtiku kaminda públiko por hasi pregunta i forma parti di un diskushon. E meta di ‘Shrew Her’ ta pa liberá patronchinan establesé pa loke ta trata ròlnan maskulino i femenino den komunidat.
‘Shrew Her’ ta tuma lugá 28 i 30 di novèmber na Hòfi Cas Cora, situá riba un tereno estupendo i tambe konosí pa su eventonan úniko. ‘Shrew Her’ ta pinta di bira un ‘You Had To Be There’ tipo di eksperensia ku bo no ke pèrd’e pa nada di mundu!
E show ta kuminsá 8 ‘or di anochi. Karchi ta optenibel na Hòfi Cas Cora, Mensing’s Caminada i kiprepublic.com

Kip Republic ta un organisashon multidisiplinario ku ta produsí proyektonan di arte i edukashon den tur área kreativo. ‘Storytelling’ ta forma e base di tur loke nos ta krea i kompartí.
Pa mas informashon bishitá nos wèpsait kiprepublic.com i pa mas informashon di Ira Kip bishitá irakip.com