WILLEMSTAD.- Durante dje rueda di prensa di Festival di Tumba 2017 sr. Manfred “Feco” Gomes a ekspresá su preokupashon pa e echo ku e Festival a pèrdè praktikamente tur su ‘brandingpartnernan’.

Esaki a trese kuné ku si dado kaso AMAK no logra haña niun partner nobo, no por garantisá ku tin transmishon di televishon, ya ku no por tin produkshon.

Gastunan di produkshon pa produkshon di Festival di Tumba pa esnan ku ta wak na kas òf den eksterior ta alrededor di 350 mil florin.

AMAK mester studia otro posibilidatnan pa garantisá entrada, esta di kambia e modelo di transmishon dirèkt di televishon. Ta pensando pa transmití e tres dianan preliminar di e festival, miéntras e final lo keda transmití pa medio di ‘pay per view’. Un posibel oumento di kantidat di ‘pay per view’ por yuda kubri e défisit di partisipashon di ‘brandingpartners’.

Sr. Gomes a enfatisá ku mester tene na kuenta ku festival di tumba finansieramente te na e momentu aki ta ‘self supporting’, sin hasi uso di fondonan di pueblo.

E festival ta bira di pueblo ora ku gobièrnu en bèrdat ta sostené e aktividat, manera ta e kaso den otro paisnan di Karibe.