WILLEMSTAD.- Siegfried Brunken, mihó konosí komo "Biro Biro", a nase dia 6 di novèmber 1950 na Kòrsou.

Biro Biro a kuminsá hunga bala na skol básiko Martinus de Porres pegá ku misa di Santa Rosa. E ku su ruman Eithel no a hunga den junior. Nan a kuminsá hunga den A-klasse i hoofdklasse ku Victory Boys i tambe den un team ku tabata yama Inter Milan di Valdemar Marcha. Riba 14 di yüni 1967 Biro Biro a kuminsá den e ekipo Victory Boys, ora el a remplasá su tata Elia Brunken ku a leshoná. Su posishon riba tereno tabata bolante.

Biro Biro tambe a hunga un temporada ku Scherpenheuvel huntu ku Baartje Koots, Richard Kip, Henny Filomena i Jozef Papito Nivillac, pa despues regresá Victory Boys.

Riba vèlt Biro Biro tabata un hungadó masha intrankil i furioso. Na tur Biro Biro a hunga 365 wega den kampionato lokal. Na diesnuebe (19) okashon el a representá Victory Boys i kolónan nashonal di selekshon Kòrsou i di Antia.

Den Biro Biro su karera komo bolante, el a anotá 24 gol. Den su klup Victory Boys semper Biro Biro a karga e flanèl number 18 i komo honor na dje e number 18 lo no keda duná na ningun otro hungadó.

Na 1975 Biro Biro a reforsá SUBT den e Torneo Internashonal di 50 aña di SUBT.

...Eithel “Capipi” Brunken i Siegfried “Biro Biro” Brunken...

Selekshon:

Na aña 1973 Biro Biro a hunga un wega amistoso ku un tremendo selekshon Kòrsou ku a gana Magallanes di Chile 2-1 den Stadion di Rif. Tambe el a forma parti dje selekshon di Antia Hulandes ku a gana Haiti 1-0, tambe na Rif.

E mesun aña 1973 Biro Biro a keda konvoká pa selekshon di Antia pa weganan Pre-Mundial na Haiti.

Na 1981 el a hunga den Selekshon Pariba vs Selekshon Pabou.

Despues di un karera di 21 aña, riba djadumingu 21 ougùstùs 1988 Biro Biro a tuma despedida ofisial di futbòl.

...Siegfried den selekshon di Kòrsou ku a gana Magallanes di Chile 2-1...

Logronan:

- 1967 Kampion di B-klasse ku Victory Boys.

- 1968 Sup kampion A-klasse ku Victory Boys.

- 1969 Sup kampion A-klasse ku Victory Boys.

- 1970 Sup kampion A-klasse ku Victory Boys.

- 1971/72 Kampion Segundo Divishon ku Victory Boys.

- 1975 di 2 lugá ku SUBT, Torneo Internashonal 50 aña di SUBT.

- 1976 Kampion Segundo Divishon ku Victory Boys.

- 1983 Sup kampion Promé Divishon ku Victory Boys.

- 1983 Sup kampion di Antia ku Victory Boys.

- 1985 Kampion Segundo Divishon ku Victory Boys.

- 1986 Sup kampion di Promé Divishon ku Victory Boys.

- 1986 Kampion di Antia ku Victory Boys.

Rekonosementu risibí:

- 1982 Distinshon komo e hungadó mas grandi den e ekipo di Victory Boys.

- 21 ougùstùs 1988 Rekonosementu di su karera komo futbolista serka hefe di Sedreko.

...Siegfried (agachá na man robes) den selekshon di Antia ku a hunga Pre-Mundial 1973 na Haiti...

...Victory Boys, ku Siegfried agachá di tres for di man drechi...