BEIJING, CHINA, AFP.- Un laboratorio chines ta desaroyando un remedi ku posiblemente por para e pandemia di coronavirus sin un vakuna. E vírus a originá na China na fin di aña pasa, kousando un karera internashonal pa haña un tratamentu i vakuna.
Sientífikonan ta desaroyando un remedi na e Universidat prestigioso di Beijing na China kual por redusí e tempu di rekuperashon di esnan infektá, i tambe ofresé inmunidat riba término kòrtiku kontra e vírus.
Sunney Xie, direktor di Bejing Advanced Innovation Center for Genomics di e universidat a bisa ku e remedi a duna resultado durante tèst ku animalnan.
E remedi ta usa antikuerponan neutralisante. Un estudio riba e investigashon, kual a wòrdu publiká den e diario sientífiko Cell ta sugirí ku e antikuerponan ta proveé un “kura” potensial pa e malesa i ta redusí e periodo di rekuperashon.
E remedi lo wòrdu di tèst na Oustralia mirando ku ya e kasonan di infekshon a neutralisá na China.