KRALENDIJK — Manera a bira tradishon, e aña aki tambe Direktiva di Skolnan Katóliko ta organisá e siman di skol katóliko pa su skolnan. Direktiva ta dediká un siman kompleto na e identidat katóliko. E aña aki e siman di skol katóliko ta tuma lugá di 5 pa 12 di aprel. Edukashon katóliko no ta solamente responsabilidat di direktiva i su personal. Na promé lugá esaki ta kuminsá na kas den famia.

Skol su tarea ta pa fortifiká esaki i sigui duna kontenido na loke a inisiá na kas. Ta p’esei skolnan katóliko ta trata den koperashon ku mayornan pa huntu pone atenshon na e formashon spiritual, ku ta kore manera un liña kòrá den tur e aktividatnan ku diariamente ta tuma lugá na skol.

E idea pa selebrashon di un siman di skol katóliko a originá na Estádos Unídos, una tin un organisashon katóliko grandi ku yama NCEA, ku ta organisá siman di skol katóliko tur aña for di 1974. NCEA ta para pa National Catholic Education Association. Su sede ta na Washington. Un otro evento ku NCEA ta organisá tur aña ta e konvenshon i i ekspo katóliko.

Kada aña e ta tuma lugá na un otro siudat na Merka. E añan aki ta toka turno na San Louis. Siman di skol katóliko ta un punto di agènda fiho durante e konferensianan di direktivanan di skolnan katóliko di Diósesis ku ta tuma lugá tur aña. Durante e konferensia ku a tuma lugá na Aruba for di aña 2012, a diskutí i aprobá temanan pa siman di skol katóliko kuminsando for di 2013-2014 te ku 2017-2018. Tópiko di e aña aki ta ‘Nos ta yamá pa prediká e bon notisia’ i e meta ta pa prediká e bon notisia.

Di kon un siman di skol katóliko, pasobra skolnan katóliko ta enfatisá e aspekto spiritual den bida di e alumno. Skolnan katóliko ta komprondé kiko ta nifiká duna atenshon na enseñansa di Hesus, manera nos konosé den iglesia katóliko. Skolnan katóliko ta ofresé e alumnonan un edukashon íntegro. Un edukashon ku ta pone atenshon riba e alumno su desaroyo korporal, kognitivo i spiritual pa asina por krese komo un bon kristian.

E siman di skol katóliko ta pa fortifiká pa medio di aktividatnan ku tin tur dia ku e alumnonan. Parokia ku ta konsistí di pastornan, katekistanan i parokianonan. Skol ku ta konsistí di dosente, alumno i otro personal i kas ku ta konsistí di mayornan. Kada partner den edukashon mester ta konsiente di e meta komun i pa asina konhuntamente traha na un desaroyo sano di e alumnonan.

Siman katóliko ta enserá aktividatnan kaminda tur e partnernan den e triángulo di formashon katóliko ta partisipá, esta kas, skol i misa. Splikashon tokante e tema di aña aki ‘Nos ta yamá pa prediká e bon notisia’ (Marko 16,15). E tarea di un kristian obediente ta pa hiba e evangelio na esnan pèrdí. ‘Bai anto hasi e hendenan den tur nashon mi disipel. Batisá nan den nòmber di Tata, Yu i Spiritu Santu i siña nan kumpli ku tur loke mi a mandá bo hasi. I sa ku mi ta ku boso tur dia, te na fin di mundu’. (Mateo 28:19- 20).