WILLEMSTAD.- Den kuadro di selebrashon di 10 aña eksistensia di Fundashon Sinta Ros, nan ta bai organisá un fiesta pa selebrá bida i rekoudá fondo pa sigui sirbi, duna asistensia, sosten i informashon na mas tantu hende posibel i esaki tantu pa esnan ku tin e kanser na pechu i esnan ku no tin e malesa.
Kada kliente Fundashon Sinta Ros ta duna sosten kompletu , konseho, guia etc., etc. debí ku e persona aki den un frega di wowo su bida ta kambia por kompletu!
FSR ta un fundashon independiente presidí pa sra. Angeline de Ron-Tromp i su direktiva formá pa solamente dama.
P’esei tur aña FSR ta hasi fundraising pa kubri gastunan operashonal, manera ( hür, awa, koriente, imprenta etc., etc.).
Nan próksimo aktividat pa rekoudá fondo lo ta un fiesta baliabel titulá , “Simplicity Benefit Party”. E fiesta aki su meta  ta pa rekoudá fondo ma tambe pa selebrá bida prinsipalmente di esnan  ku nan a sostené durante 10 aña largu.
E fiesta lo tuma lugá na Brakkeput Mei Mei dia 18 di novèmber di 21:00 pa 2:00.
Animashon musikal lo ta na enkargo di ERA i TUNE.
Tune lo presentá ku un front forma pa Jill, Benoni, Luwi Jano, Tico Libiee i direktamente for di Ulanda pa promé biaha for di dia el a bandoná Tune, Clifton End,  stail di Baya i ‘last but not least’, Dj Argenis Huerta ku un show di lus di kita sombré.
Pa hasi e kos mas atraktivo lo tin un ‘premio di porta’ ku lo ta un ticket pa Miami ku American Airlines.
Na nòmber di Fundashon Sinta Ros nos kier a invitá tur hende pa kumpra nan karchi na sea Mensing’s Caminada, 24 uur uit de muur i tambe na miembronan di FSR , koperá ku un tremendo kousa i alabes biba huntu ku nan