KRALENDIJK – “E kos aki ta puru pèstmentu”, Martinus ta bisa. E ta referí na e echo ku su yu tin 4 aña den un bataya ku unidat Asuntunan Sosial i Empleo (SZW) p kubri gastu di un laptop. Esaki ta esensial pa desaroyo di su yu mirando ku e ta konosí ku outismo.

E situashon aki a bai para te den korte durante e tal yama ‘bodemprocedure’. Hues a duna e demandante rason i a disidí ku SZW mester paga un laptop di 1650 dòler.

Segun Martinus nan a pensa ku porfin e yu lo yega na un laptop, pero esaki no ta e kaso.

“SZW ta apelá e desishon pasombra nan no ta di akuerdo ku e montante.” Ta trata aki di e preis pa un Apple Macbook Pro. “Esaki ta loke e spesialista a sugirí. Sigur e lo dura 5 aña kuné”, Martinus ta agregá.

E ta bisa ku SZW ke paga ménos sèn. “Nan ke kubri un laptop básiko. Esaki no por. E laptop mester di sierto kapasidat, memoria i spit pa por drai ku e programanan ku mester”, e ta bisa.

Reportero di BONERIANO a aserká SZW pa un reakshon. Ainda nos ta sperando riba nan kontesta.