ORANJESTAD – Definitivamente carnaval pa februari 2022 ta cancela. Asina presidente di SMAC Jason Brown a confirma pa noticiacla diahuebs. Cu cancelacion, Brown kier men e carnaval manera cu nos conoce, esta paradanan y tur actividad publico cu ta bin cu ne. Loke ta purbando pa haci ainda ta pa organisa algun actividad separa, pa toch tin e sentido di carnaval. Y ta enfocando completamente pa un posibel carnaval pero den zomer di 2022. E posibilidad ey ta existi ainda y ta riba esey tur e enfoke di SMAC ta bay ta awor segun Brown.

COVID19

Manera cu Brown a splica, no ta responsabel awor pa organisa un carnaval manera cu nos conoce, no solamente pa e pandemia pero e situacion financiero cu nos pueblo ta aden debi na e pandemia. Planeacion, manera ta conoci, ta tuma hopi tempo esaki no ta factibel aworaki. Por lo menos no pa februari. Pues, a confirma e ora cu pa februari di otro anja, carnaval manera cu nos conoce, ta cancela.

SMAC: Preparacion ta bayendo bon pa e Jump Start Ball den Marriot Ballroom

Mientras cu carnaval di Aruba pa februari 2022 ta cancela, SMAC ta den full preparacion pa e fiesta carnavalesco conoci como Jump Start ball si cu ta tuma lugar awor dia 27 di November proximo. Segun presidente di SMAC Jason Brown, e evento lo tuma lugar den Marriott Ballroom, y ta destina pa 500 persona. Pues no ta solamente pa pareha manera cu a anuncia anteriormente. Por tin pareha pero tambe lo bende carchi los. Pa un persona por drenta e fiesta, e mester tin prueba di ta full vacuna, of mester tin un PCR test negativo no mas bieu cu 24 ora. Pa loke ta e musica, lo tin por lo menos 3 banda, Tsunami, N’Fusion Y Robert y Su Solo Banda Show, y tambe cu DJ Vibes y MC Campo y e fiesta lo ta entre 9or di anochi pa 2or di marduga.

INTENCION

E intencion di e fiesta ta pa por midi e situacion di fiesta y con tin cu bay deal cu fiestanan den futuro, relaciona cu e pandemia. E lo ta un bon 'training' pa esnan di DVG y Crisis Team pa wak kico tur falta y no, pa asina prepara pa organisa futuro fiestanan publico.