WILLEMSTAD.-E kampeonato lokal di Sòftbòl femenino ‘fastpitch’ a kue un rumbo realmente interesante danki na presensia di vários sòftbolista estrea di estranheria ku ta hungando pa nos ekiponan. Sin eksepshon tur tim di Dòbel A a reforsá, i ku playoff programá pa start dia 30 di òktober e espektativanan ta hopi haltu. Ta spera sigur bon bataya entre e ekiponan.

Souax ta komandá:

E ekipo di Souax ta komandando e tabla di posishon ku rèkert di 10 ganá i 2 pèrdí. Souax su estrea indiskutibel ta e picher merikano Aspen Wesley ku tin rèkert di 9-0, ku efektividat di 0.40 i 131 ponche tirá den 69 inning. Fuera di e estrea Wesley ku sin duda ta e mihó picher di e kampeonato. Souax tin tambe Chice Malau’ulu ku ta un outfielder. Malau’ulu tin averahe di .448, di dos mihó bate dje kampeonato. Tambe e sòftbolista ku a hunga pa e selekshon hulandes Damisha Charles. Souax ademas tin vários bon sòftbolista manera: Tanisha Gil ku tin averahe di .444.  Otro sòftbolistanan bon di nan ta: Rianthe Winklaar, Akeelah Roojer i Trishantely Alexandre.

Pichingolo/Nissan basta serka:

Pichingolo Nissan enkabesá pa e sòftbolista merikano Jasmin Jackson ta manteniendo nan mes hopi serka, apénas ½ wega di Souax ku rèkert di 10 ganá i 3 pèrdí. Jackson ku ta un estrea ta hunga shortstop i ta liderá e kampeonato ku averahe di .600 ku 18 hit den 30 turno, i 8 doblete. Pichingolo tin 2 sòftbolista merikano mas huntu ku vários sòftbolista lokal di bon nivel manera: Julise Koffy, “Nisha” Romano, Melanie Castro-Arias i Kimmy Agard. E estrea “Pipi” Hariquez a bin Kòrsou tambe pa kumpli su weganan pa por ta disponibel pa playoff.

Fenix di Lernnert Angela:

Fenix tin rèkert di 6-6 na di tres lugá. Nan a reforsá ku 2 sòftbolista di Merka i 1 di México. Katherine Carter ta nan  picher estrea, Reagan Glanz ta nan catcher i tambe nan tin e infielder di México: Alegria Rodriguez. Fenix por konta ku vários mucha di nos tambe ku ta bon hungadó manera: Suheydi Faneyt, Deidra da Costa Gomez i rumannan Benita.

Sta. Rosa Angels:

Sta. Rosa Angels a trese e picher Olivia Contreras, tambe nan tin  e catcher: Liliana Arredondo, ámbos ta di México. E rèkert di Sta. Rosa Angels ta di 4 ganá i 8 pèrdí, pero nan lo klasifiká i lo por bira peligroso ku sòftbolistanan lokal manera: Shurvienska Wawoe, Ciroëndra Peloz i e estrea Lee-Ann Craanberg.

Rising Trotters:

Apesar di no a logra triunfo ainda, e tim di Rising Trotters ta demostrando ku nan a tuma e kosnan na serio i a trese e lansadó estrea for di Colombia ku ta Libis Hurtado. Libis ta pichando bon i Trotters lo por haña number di kas kualke momento.

Standing:

Souax 10-2, Pichingolo 10-3, Fenix 6-6, Sta. Rosa Angels 4-8, Rising Trotters 0-11.

Kontinuashon Di Kampeonato:

E kampeonato ta kontinuá mañan 21 di òktober na Sabana Ballpark serka “Chati” ku 7.30: Souax vs Fenix i 9.30 pm: Sta. Rosa Angels vs Rising Trotters.

Playoff Dòbel A:

Playoff Dòbel A ta programa pa start dia 30 di òktober na Sabana Ballpark. 11 di novèmber si tur kos bai normal ta start ku e final na Sam Buntin Ballpark na Brievengat.

Algun nota interesante:

E weganan sin duda ta bon, i tur ku ta bai parke o sigui e weganan via “FB” ta disfrutando...

....

Sòftbòl femenino a regresá Sabana Ballpark loke sin duda ta un dushi notisia, ya ku pa tradishon semper a hunga riba e parke di “Chati” na Zapateer...

....

Aspen Wesley, merikano di Souax ta sin duda e mihó picher dje kampeonato. El a tira 131 ponche den 69 inning, i su efektividat ta di apénas 0.40...

....

Rising Trotters a trese Libis Hurtado ku ta demostrá atrobe ku e ta un “Kabai di Heru”, i e lo por pèrkurá pa Trotters haña number di kas...

...

Jasmin Jackson, merikano di Pichingolo/Nissan ta un atrakshon kompleto, fildeando i bateando, i fuera di esei un mucha muhé sumamente simpel i “down to earth”....

...

Ta bon pa CSB wak kon ta hasi pa por tin un anunsiadó na wega, i algu di músika pa pèrkurá pa poko alegria. Tremendo wega djasabra na Sam Buntin, pero poko ambiente, ketu...

...

Great di tende i sa ku nos sòftbòl femenino ‘fastpitch’ ta na “bida”...

Skibi pa: Taffy de Jongh