MIAMI, MERKA.- Marc Anthony, J-Lo i Alex Rodriguez a konsolidá un biaha mas e enorme poder ku nan tin pa kombens’é hende pa aportá durante dje konsierto ‘Somos Una Voz’ na momentu ku nan a logra pa rekoudá 35 mion dòler pa Puerto Rico, Mexico i tur e otro lugánan ku a keda afektá pa e resien desasternan natural.
E enorme inisiativa aki ku a keda realisá djasabra último simultáneamente for di Los Angeles i Miami a konta ku apoyo di algun dje figuranan mas importante dje mundu di deporte i arte manera Daddy Yankee, Nicky Jam, Prince Royce, Alejandro Sanz, Camila, Gente de Zona, Romeo Santos i dj Khaled kendenan a kanta den e stadion di Miami Marlins huntu ku Marc Anthony.
J-Lo di su banda a presentá na Los Angeles huntu ku Demi Lovato, Maroon 5, Ricky Martin, Gwen Stefani, Stevie Wonder, Chris Martin, Mary J. Blige i Andra Rey.
Otro streanan tambe a duna nan aporte kontestando telefòn manera Ellen Degeneres, Wilmer Valderrama, Zoe Vales i Jamie Foxx. E evento a marka tambe un kapítulo históriko pa televishon spañó na Merka, tabata e promé biaha ku e dos kadenanan mas grandi di televishon na Merka a uni pa hasi un transmishon bibu.