Gezaghebber: Evitá di drenta laman

KRALENDIJK.-E desaroyonan rondó di e rèptil den awanan di Sorobon na Boneiru ta motibu ku a tene un konferensha di prensa. Gobièrnu di Boneiru pa medio di gezaghebber John Soliano huntu ku direktor interino di Stinapa a splika ku e animal ta un krokodel di awa salu, i kaminda a mira e reptil ta den su habitat esta den e área ku palu di mangel(Mangrove) na Sorobon. E konseho ta pa no drenta laman den e área ei anto si un hende ke drenta laman tòg e ta hasi esei riba su propio responsabilidat.

Gezaghebber John Soliana

Gezaghebber Soliano a duna di konosé ku e momentu ku e krokodel a presentá no tabata esun mihó konsiderando ku nèt Boneiru tabata den klousura di Regata pues ku hopi moveshon den i rondó di playanan. Pa loke ta trata e situashon aktual gezaghebber a duna di konosé ku mas o menos 11’or di awe mainta a mira e krokodel. E ta den e área ku palunan di mangel no ta normal ku hende ta bai pues mesora e suplika pa niun hende no bai den e área ei awor tampoko.

‘E tipo di animal aki ta timido, e no ta dirigí riba hende. Ademas e ta kome bestia chikí so manera lagadishi, piska, para etc. E desishon ku gobièrnu a tuma ta ku negoshinan na Sorobon por kuminsá duna servisio bèk awe 12’or. Esaki bou di kondishon ku no ta permití niun hende pa drenta e área di palu di mangel te proksimo aviso”. Mas aleu e gezaghebber a bisa ku a marka algun área adishonal unda tampoko ta permití pa hende bai. E konseho prinsipal ta keda pa evitá di drenta laman, i esun ku drenta laman tog ta hasie pa su propio responsabilidat. Tambe ta prohibí pa persona i of instansianan tuma niun klase di inisiativa pa bai buska e rèptil.

Di parti di Stinapa sr. Sjon van Essen a duna di konosé ku hasiendo uso di drone nan ta sigui e animal i ta hasiendo e trabounan pa kaptur’e. Una bes ku esei sosodé lo hiba e krokodel na un sitio adekuá. Mas detaye den edishon di EXTRA.