WASHINGTON, AP.- E sospechoso di 20 aña ku ta tras di e tiroteo den un sentro komersial di Washington no a papia i ta aktua manera un zumbi ora el a keda detené pa polis, kasi 24 ora despues ku e operashon di búskeda a kuminsá, segun outoridatnan. E agresor a keda deskribí komo un hispano pero e teniendo di polis Mike Hawley a bisa ku esei nan a base riba e promé deklarashon di testigunan di e tiroteo. Arcan Cetin a yega Merka di Turkia i tin pèrmit pa biba permanente na Merka. Un biaha el a keda detené pa agreshon asina e teniente a splika. Hawley a bisa di a mira Cetin djasabra anochi ora e tabata patruyando na Oak Harbor i a rekonosé mesora komo e sospechoso ku a mata 5 persona den Cascade Mall den serkania di Burlington.
Den un rueda di prensa Hawley a bisa ku el a keda informá ku Cetin ta biba den Oak Harbor i ku e tabata den e zona. “Mi a para mesora bula baha di mi outo i Cetin a keda paralisá”. Cetin tabata desarmá na e momentu ei i tabatin serka dje un tas ku kòmpiuter den dje. E tabata manera un zumbi, asina Hawley a bisa. E detenshon a pone fin na un búskeda intenso despues di asesinato di 5 persona un dia promé. E promé yamada di emergensia a sosodé poko promé ku 7’or di anochi djabièrnè ora Cascade Mall tabata yen di hende.
