ARUBA.- Ayera e organisashon di Soul Beach Music Festival a anunsiá e artistanan prinsipal pa e di 18 edishon di SBMF 2018.
Alicia Keys, Maxwell i e komediante Marlon Wayans ta e nòmbernan ku a keda anunsiá.
Alicia Keys no mester di niun klase di introdukshon, 15 biaha ganadó di un Grammy Award komo kantante, kompositor i produktor. Ku mas di 25 mion álbum bendí rònt mundu Alicia Keys ta regresá Aruba despues ku na 2006 e tabata invitá na e evento.
Otro dje artistanan ku a keda menshoná ta Maxwell, ganadó di tres Grammy, 1 ‘Outstanding Male Artist’ di NAACP Image Award i 1 Soul Train Award pa ‘Best R&B/ Soul Male Artist’.
E último pa keda anunsiá e aña aki, Marlon Wayans ta konosí pa diferente programa popular di televishon, entre otro pa ‘The Wayans Bros.’. E pelíkulanan den kua Marlon a partisipá a generá mas ku 736 mion dòler na entrada na Merka. Un popular kómiko ku e aña aki tabatin su promé ‘Stand-Up Comedy special’ riba Netflix.
Aruba su Soul Beach Music Festival ta tuma lugá entre 23 pa 28 di mei 2018.