MADRID, AP.- E eks presidente di Catalonia, Carles Puigdemont, ta enfrentá opstákulonan adishonal den su intento pa postulá pa su kargo bieu desde su refugio na Bèlgika.
Asesornan hurídiko a indiká djaluna na parlamento katalan ku Puigdemont ta inkapasitá pa huramentá komo gobernante. E mester por presentá físikamente na kámara, i e presidènt di gobièrnu Mariano Rajoy a anunsiá ku Madrid lo tene kontròl di Catalonia si e polítiko separatista fugitivo di hustisia spañó pretendé di huramentá desde Bruselas.
E akontesimentunan di djaluna e kompliká e akshon di Puigdemont, kende mester a presentá su kandidatura den parlamento di Catalonia mediante un video òf delegado. Di e forma aki, e eks gobernante lo evitá di regresá Spaña i wòrdu detené. Puigdemont a wòrdu reeligí komo legislador regional den elekshon parlamentario di luna pasá despues di hasi kampaña na Bruselas.
Despues di analisá lei, e huristanan di parlamento katalan a bisa ku Puigdemont no por huramentá komo presidente di Catalonia mediante un video. Un di e argumentonan ta ku e kandidato mester debatí kara kara ku e partidonan polítiko, segun un despacho di e agensia di notisia Europa Press.
Oposishon anti independista di e region i gobièrnu di Rajoy a bisa ku lo presentá e asuntu den Tribunal Konstitushonal di Spaña si e legisladornan skohe Puigdemont komo presidente di Catalonia. Ademas, Rajoy a bisa djaluna ku e presidente nobo di e region mester huramentá esun ku asumí e kargo personalmente.
“Ta apsurdo ku un persona kier pretendé di postulá pa presidensia estando na Bruselas i fugitivo di hustisia”, asina Rajoy a deklará djaluna. “Esaki ya no ta un problema polítiko i hurídiko, awor el a bira un problema di puru sentido komun”.
