MADRID, SPAÑA (AFP).- Spaña a yama bèk su embahador na Buenos Aires i a eksigí diskulpa dje presidente argentino, Javier Mileo, pa a usa e palabra “korupto” refiriendo na kasá dje presidente di gobièrnu spañó, Pedro Sanchez, durante un reunion na Madrid.
“Mi ta anunsiá di a kaba di tuma kontakto ku nos embahador na Buenos Aires”, segun José Manuel Albares, despues di a denunsiá algun palabra “hopi grave” i “sin presedente den historia di relashonnan internashonal”.
“Spaña ta eksigí despensa públiko di señor Mileo. Den kaso ku e no diskulpá su mes, nos lo tuma e medidanan ku nos ta kere ta oportuno pa defendé nos soberania”, Albares a anunsiá
Durante di un diskurso den un reunion na Madrid di dirigentenan di ekstrema derechi organisá pa e partido spañó Vox, Milei a referí na Begoña Gomez komo “muhé korupto”. Ounke e no a identifiká Sanchez of esaki su kasá na nòmber, e referensia di Milei a habri kaminda pa identifiká e pareha.
“E elitenan global no ta ripará kon difísil ta pa por implementá ideanan di sosialismo, sigur ora bo tin un muhé korupto…” segun parti di lokual Milei a trese dilanti.
Begoña Gomez ta bou investigashon pa supuesto relashon komersial ku empresanan ku ta risibí yudansa di e gobièrnu enkabesá pa su kasá.
Milei a reakshoná riba yamadanan ku el a risibí, refiriendo na loke el a bisa den su diskurso ora ku el a publiká esaki riba retnan sosial: “Pa mas ku tin hende ke tapa solo ku man, ata’ki e palabranan ku m’a ekspresá i ku ta pone algun hende sinti nan mes inkómodo”.
