WILLEMSTAD.- Riba dianan 15, 16 i 17 di yüni e skol di teater hubenil ‘Drazans’ ta presentá ‘Spiegeltje Spiegeltje’ komo nan último presentashon pa e aña teatral. Drazans ta primintí ku e lo bira un historia mágiko pa grandi i chikí. Den e kapia di Klooster Scherpenheuvel e historia mágiko aki ta mira lus di dia ku un elenko di artistanan hóben i ku disfrasnan bunita. Meskos ku aña pasa ‘Belle en het Beest’, e obra aki a keda produsí pa Sophie Bakker i Maaike Kempers den kolaborashon estrecho ku Inet Arts. ‘E ta un historia mágiko ku un elenko hóben komprometé i ku pashon, disfrasnan bunita i na un sitio kaminda e presentashon lo bira un spesial’, asina Bakker i Kempers a komentá. E prínsipe lo ta na ora pa e salba ‘Sneeuwwitje’? Karchi ta na benta na Van den Tweel Zeelandia, Jan Thiel i na Drazans. E presentashonnan lo ta riba djabièrnè, 15, djasabra 16 i djadumingu 17 pa 7.30 di anochi na e kapia di Klooster Scherpenheuvel.